ភ្នំពេញ៖ ក្រសួងបរិស្ថានបានសហការជាមួយក្រុមហ៊ុន អេកូបាត អេនើជី អ៊ិនវេសម៉ិន អ៊ិនធើណេសិនណល ឯ.ក ក្នុងការប្រមូលសំណល់អាគុយ សំណល់ថ្មពិល និងសំណល់បរិក្ខារអគ្គិសនី និងអេឡិចត្រូនិក ប្រភេទជាទូរស័ព្ទ កុំព្យូទ័រ ទូរទស្សន៍ ទូទឹកកក ម៉ាស៊ីនត្រជាក់ ម៉ាស៊ីនបោកគក់ ម៉ាស៊ីនព្រីន និងម៉ាស៊ីនថតចម្លង ។ល។ ដើម្បីយកមកទុកដាក់ឱ្យបានត្រឹមត្រូវ និងប្រកបដោយសុវត្ថិភាពដល់បរិស្ថាន។

ក្រសួងបរិស្ថានបញ្ជាក់ថា សំណល់អាគុយ សំណល់ថ្មពិល និងសំណល់បរិក្ខារអគ្គិសនី និងអេឡិចត្រូនិក គឺជាសំណល់បង្កគ្រោះថ្នាក់ ដោយក្នុងនោះមានសារធាតុ បារត កាត់ម្ញ៉ូម នីកែល ក្រូម អាសេនិក និងសំណ។

ប្រសិនបើមិនទុកដាក់ឱ្យបានត្រឹមត្រូវទេ នោះនឹងធ្វើឱ្យមានការសាយភាយសារធាតុគ្រោះថ្នាក់ចូលក្នុងបរិស្ថាន និងបង្កផលប៉ះពាល់ធ្ងន់ធ្ងរដល់សុខភាពមនុស្សដូចជា ប៉ះពាល់ឆ្អឹង ខូចតម្រងនោម ខូចប្រព័ន្ធប្រសាទ ខូចចលនាសាច់ដុំ ខូចប្រព័ន្ធភាពស៊ាំ និងប៉ះពាល់ការបង្កកំណើតទារក និងទារកក្នុងផ្ទៃ ជាដើម។

ក្រសួងបរិស្ថាន បានណែនាំឱ្យពលរដ្ឋរក្សាទុកសំណល់អាគុយ សំណល់ថ្មពិល និងសំណល់បរិក្ខារអគ្គិសនី និងអេឡិចត្រូនិកបណ្ដោះអាសន្នឱ្យបានត្រឹមត្រូវ។ ជាមួយគ្នានេះ ពលរដ្ឋអាចយកសំណល់ទាំងនោះមកទុកនៅទីតាំងដែលមានធុងប្រមូលសំណល់អាគុយ សំណល់ថ្មពិល និងសំណល់បរិក្ខារអគ្គិសនី និងអេឡិចត្រូនិក ដោយអាចទាក់ទងតាមលេខទូរស័ព្ទ ០១១ ៣៩៩ ១២២/០១១ ៩៩៩ ៩១០/០១៧ ៤៦១ ៨១៩។

គិតត្រឹមឆ្នាំ២០២២ ក្រសួងបរិស្ថានបានដាក់ធុងប្រមូលសំណល់ថ្មពិលបានចំនួន ១០៣ ធុង នៅទីតាំងចំនួន ៩៧ ទីតាំង ទូទាំងកម្ពុជា និងបានប្រមូលសំណល់ថ្មពិលប្រមាណ ៨៦៦ គីឡូក្រាម។ ជាជំហានបន្ត ក្រសួងនឹងមានគម្រោងរៀបចំដាក់ធុងប្រមូលសំណល់បរិក្ខារអគ្គិសនី និងអេឡិចត្រូនិកនៅតាមទីតាំងមួយចំនួននៅរាជធានីភ្នំពេញ៕